ईयूले इरानको इस्लामिक रिभोलुसनरी गार्ड कर्प्स (आईआरजीसी)लाई आतंकवादी संगठन तोकेपछि प्रतिशोधमा यो कदम चालिएको हो । यो निर्णय ‘आईआरजीसीलाई आतंकवादी घोषणा गरिएविरुद्धको प्रतिकार कानुनको धारा–७’ अन्तर्गत गरिएको इरानी संसदका सभामुख मोहम्मद बाघेर घालिबाफले आइतबार बताए । ईयूले अमेरिकाको ‘अन्धो आज्ञापालन’ गरेर आफ्नै जनताको हितविपरीत कदम चालेको आरोप उनले लगाए ।

यसअघि बिहीबार ईयूकी विदेश नीति प्रमुख काजा कालासले आईआरजीसी माथिको प्रतिबन्ध घोषणा गर्दै आफ्नै जनतालाई मार्ने शासन मौन रहन सक्दैन भनेकी थिइन् । अमेरिकामा रहेको मानवअधिकार संस्था एचआरएएनएका अनुसार डिसेम्बर २८ देखि सुरु भएको देशव्यापी प्रदर्शनमा इरानमा ६ हजार ७१३ जनाको मृत्यु भएको पुष्टि भएको छ ।

आईआरजीसी १९७९ को इस्लामिक क्रान्तिपछि गठन भएको इरानको शक्तिशाली सैन्य निकाय हो । यसले सीधै सर्वाेच्च नेता आयातोल्लाह अली खामेनीलाई रिपोर्ट गर्छ । यसले क्षेत्रीय प्रभावमा प्रमुख भूमिका खेल्छ।

इरानी अधिकारीहरूले भने ३ हजार ११७ जनाको मृत्यु भएको र त्यसमा २ हजार ४२७ निर्दोष प्रदर्शनकारी वा सुरक्षा अधिकारी रहेको बताएका छन् । प्रदर्शन उत्कर्षमा पुग्दा जनवरी ८ को रातभर देशभर इन्टरनेट र मोबाइल सेवा काटिएको थियो ।